រុស្សី៖ ប្រទេសរុស្សីបាននិយាយកាលពីថ្ងៃសុក្រថា រោងចក្ររបស់ក្រុមហ៊ុនផលិតរថយន្តជប៉ុន Toyota នៅទីក្រុង St Petersburg ត្រូវបានប្រគល់ទៅឱ្យអង្គភាពរដ្ឋ NAMI ដែលមានន័យថាទ្រព្យសម្បត្តិកាន់តែច្រើនពីក្រុមហ៊ុនផលិតរថយន្តនៅក្នុងប្រទេសរុស្សីត្រូវបានចាប់យក និងដកចេញពីក្នុងប្រទេសនេះដោយសារតែបញ្ហាជម្លោះនៅអ៊ុយក្រែន។
ក្រសួងឧស្សាហកម្ម និងពាណិជ្ជកម្មរបស់រុស្សីបានប្រកាសថា ទីតាំងផលិតកម្មនៃក្រុមហ៊ុនតូយ៉ូតា នៅក្នុងទីក្រុង St Petersburg នៅក្នុងដំណាក់កាលនេះ គឺត្រូវបានផ្ទេរទៅឱ្យរដ្ឋវិញ។ កិច្ចព្រមព្រៀងនេះមានន័យថាជាការប្រគល់សិទ្ធិកម្មសិទ្ធិពេញលេញនៃអគាររោងចក្រ ឧបករណ៍ និងដីនៃក្រុមហ៊ុនទាំងមូល។
NAMI ដែលជាវិទ្យាស្ថានស្រាវជ្រាវ និងអភិវឌ្ឍន៍រថយន្ត និងម៉ាស៊ីនរបស់រុស្ស៊ី ក៏ទើបតែបានទទួលរួចរាល់ហើយដែរ នូវរោងចក្ររបស់ក្រុមហ៊ុនផលិតរថយន្តចំនួនពីរផ្សេងទៀតដែលរួមមាន Nissan និង Renault។ យ៉ាងណាមិញ មកទល់ពេលនេះនៅមិនទាន់មានការអត្ថាធិប្បាយណាមួយពីក្រុមហ៊ុន Toyota ទេ ខណៈកាលពីដើមខែមុនខ្លួនធ្លាប់បានលើកឡើងថា ក្រុមហ៊ុនកំពុងពិចារណាពីជំហានបន្តអំពីការសម្រេចចិត្តទាក់ទងនឹងទីតាំងរោងចក្រនេះ។
គួរបញ្ជាក់ថា ក្រុមហ៊ុន Toyota បានសម្រេចចិត្តបញ្ចប់ការផលិតរថយន្តនៅក្នុងប្រទេសរុស្ស៊ីកាលពីឆ្នាំមុន បន្ទាប់ពីបានផ្អាកការផលិតនៅ St Petersburg កាលពីខែមីនា ឆ្នាំ២០២២។ ក្រុមហ៊ុន Toyota បាននិយាយកាលពីខែកញ្ញាថា ខ្លួនបានសម្រេចចិត្តបញ្ឈប់ការផលិតរថយន្តនៅក្នុងប្រទេសរុស្ស៊ី ដោយសារតែការរំខាននៅក្នុងការផ្គត់ផ្គង់សម្ភារៈ និងគ្រឿងបន្លាស់សំខាន់ៗ។ ដោយឡែក ក្រសួងឧស្សាហកម្ម និងពាណិជ្ជកម្មរុស្សីបានបញ្ជាក់់ថា ខ្លួនកំពុងបន្តកិច្ចការងារដើម្បីដំណើរការរោងចក្រនេះឡើងវិញឱ្យឆាប់បំផុតតាមដែលអាចធ្វើបាន៕
